Түркістан облысында зейнеткерді қорқытып, тонап кеткен үш күдікті ұсталды

Төлеби аудандық полиция бөліміне жалғызбасты зейнеткер тұрғын әйел арызданды. Оның айтуынша, түнгі уақытта белгісіз үш ер адам үйіне терезесін бұзып, баса-көктеп кірген. Содан жатын бөлмесінен алтын бұйымдары мен екі телефонын, банк картасын жымқырып кеткен, – деп хабарлайды Polisia.kz.

Полицейлер аталған фактіні ҚР ҚК-нің 191-бабы (Тонау) бойынша тіркеуге алды.

Тәртіп сақшылары аталған хабарламаны алған бойда, күдіктілердің жеке басын анықтауға бағытталған қажетті шараларды қабылдап, жедел-іздестіру жұмыстарын жүргізді. Тұрғындардан сұрастырылып, жақын аймақтағы бейнебақылау камералары мұқият тексерілді.

Нәтижесінде полицейлер күдіктілерді қолға түсірді. Олар жұмыссыз, бұрын сотты болған жергілікті тұрғындар болып шықты. Анықталғандай, олар қолды болған телефон мен алтындарды сатып, қаражатын бас пайдалары үшін жаратып жіберген. Қазіргі таңда сотқа дейінгі тергеп-тексеру амалдары жүргізіліп жатыр.